17:38 04-02-2022
news_image
506
OLİMPİADA

Pekin-2022-nin gözəlləri - FOTOSESSİYA

Pekin-2022 Qış Olimpiya Oyunlarında iştirak edən ən gözəl qadın idmançıların “onluğ”u açıqlanıb.

Apasport.az saytının məlumatına görə, olimpiyaçılar təkcə yarışlar deyil, sosial şəbəkələrdəki fəallığı ilə də populyarlaşıb.

Qış idman növlərindən yalnız fiqurlu konkisürənlər öz gözəlliyini yarışda nümayiş etdirə bilər. Digərləri isə bunun üçün sosial şəbəkələrdən yararlanır.

Mixaela Şiffrin, dağ xizəyi (ABŞ)
O, 16 yaşında ölkə çempionu olmaqla bunu bacaran ən gənc dağ xizəkçisi adına yiyələnib. 26 yaşlı idmançı ikiqat Olimpiya, altıqat dünya çempionudur.

Yutta Lerdam, konkisürmə (Niderland)
Böyüklərin yarışlarında 2019-cu ildə debüt edən niderlandlı artıq üçqat dünya çempionudur. Ötən il Avropa çempionatında qızıl və gümüş əldə edən idmançı Pekində də favoritlərdən biridir.

Doroteya Virer, biatlon (İtaliya)
Dəqiq atəşi və sürətli qaçışı ilə fərqlənən italiyalı estafetdə Olimpiya mükafatçısıdır. O, dünya çempionatlarında üç qızıl, dörd gümüş və üç bürüncə sahibdir.

Yuliya Katakina, skeleton (Rusiya)
Məşqçiləri onu orta məktəbdə tapıblar. Qaçış, balet və gimnastika ilə məşğul olan qız skeletonda gənclər arasında dünya çempionudur.

Eylin Qu, fristayl (Çin)
Çini təmsil edən 18 yaşlı amerikalı dünya səviyyəli titullara malikdir. Fəal həyat tərzi sürən idmançı jurnallara poza verir, zərgər şirkətləri, modalar evi və alt paltarı brendi ilə əməkdaşlıq da edir.

Frida Karlsson, xizək yarışları (İsveç)
Millinin üzvü Anna-Mari Elizabet Karlssonun qızı uşaq vaxtından bu idman növünə bağlanıb. Futbol üzrə ikinci divizion və qaçışla məşğul olan isveçli atletika üzrə Avropa çempionatında “altılığ”a da düşüb.

Sara Takanasi, tramplindən tullanma (Yaponiya)
Bu idman növündə heç bir qadın onun qədər medal qazanmayıb. 25 yaşlı idmançı Soçidə 4-cü, Pxençxanda 3-cü olub.

Yuliya Taubits, kirşə idmanı (Almaniya)
2003-cü ildə bu idman növünə başlayan idmançı 16 ildən sonra dünya kubokunu əldə edib. O, son dünya çempionatında iki qızıl medal qazanıb.

Reyçel Homan, kerlinq (Kanada)
5 yaşından bu idman növü ilə məşğul olan idmançı 22 yaşında ölkə çempionu adını qazanıb. O, 2017-ci ildə dünya çempionu da olub.

Kaylani Kreyn, fiqurlu konkisürmə (Avstraliya)
Avstraliyalı 8 yaşında konki üzərində dayanmağa başlayıb. O, altıqat Avstraliya çempionudur.